2Cor 12 | TPZ | STEP | Ahik hah ta meh hanan nöß to teß me noß, eöß se teß avoeß e noß pa kë a ëhnaneoß. Oman! A taateß pamëh to hikta antoen non a vaßaus a ra. Ivëhkëk, eöß to kehkeh soe tavus noß a ma tata peöß, me a ma soe ne Sunön to vatvus ka neoß.

2 Corinthians 12

A Pah Teß To Tata Non E Sosoenën, Ke Sosoenën Soe Ke Poan A Ma Soe Peo

1 Ahik hah ta meh hanan nöß to teß me noß, eöß se teß avoeß e noß pa kë a ëhnaneoß. Oman! A taateß pamëh to hikta antoen non a vaßaus a ra. Ivëhkëk, eöß to kehkeh soe tavus noß a ma tata peöß, me a ma soe ne Sunön to vatvus ka neoß. 2 Eöß to nat noß, a pah teß va pa napan varih to vaman ne e Kristo, no pöh havun me ro taanaß kirismas to oah voh, ne Sosoenën to me peah voh a teß pamëh manuh pa vakön vöön va kin. Eöß to hikta nat noß, a teß pamëh to nö me en po sionin, keß eß to këh voh en po sionin, keß a tuvuh varoe to nö. E Sosoenën varoe to nat non a tah pamëh. 3 Eöß to nat va e noß manih pan, e Sosoenën to me peah en pa teß pamëh manuh pa Vöön va Kin. Eöß to hikta nat noß pan, eß nö me voh en po sionin, keß a tuvuh varoe to nö. E Sosoenën varoe to nat non a tah pamëh. Ka manuh pa Vöön va Kin neß to pënton a soe no a hikta teß to antoen non a vatvus vamaaka a soe pamëh pa rivoneah, pareß suupon rakah me e non pa teß pa vatvus a soe pamëh. 5 Eöß to kehkeh kë rakah e noß pa ëhnan a teß pamëh. Ivëhkëk, eöß to hikta iu kë koman hah a noß. Eöß to antoen varoe noß a kë a ëhnaneoß, suk a ma tah to vataare ne, a ö nöß to hikta teß me noß to kikis. 6 Ivëhkëk, eöß se keh koman noß a kë koman hah a ëhnaneoß, paröß hikta se teß noß pan eöß a teß papön. Suk ataeah, eöß to vavatvus vaviß e noß sih pa soe man. Ivëhkëk, eöß to hikta iu kë koman noß a ëhnaneoß, suk eöß to hikta iu noß a ö no a napan se koman vapeah ka no neoß. Ee se inan voh pa taateß nöß to nonok noß, pare tënan a soe nöß to vavatvus noß, ka ma tah poë varih se vataare non raoe o toßtoß peöß, kee sih koman poß ne a ëhnaneoß.

A Tah To Teß Va Non Manih Pa Tah Toßtoß To Miröß A Sionin E Pöl

7 E Sosoenën to vataare voh a neoß a ma tah vihvih rakah. Ivëhkëk, eß to hikta iu non a ö nöß se kokoman vörep noß a ma tah poë varih. Paröß vaeö suk noß a taateß peöß. Ivëh, keß vanö maß a tah to teß va non manih pa tah toßtoß, ko rukruk non a sionineoß. Ka tah pamëh, eß a teß teßteß soe pe susun po oraß hat, eß to nö maß to rukruk vakmis e non peöß, me eß to vöknah rakah en peöß, köß hikta onöt noß a haraß vaeö, ko kë koman hah öß. 8 A kukön tëëm rakah nöß to hinhin noß e Topoan, pan eß se vahik këh a neoß pa tah pamëh. 9 Ivëhkëk, e Topoan to soe va ka neoß manih pan, “Ahik. Suk ataeah, o ururuan peöß to onöt rakah e non pën. Pa tëëm nën to hikta teß eh nom, o kikis peöß to tavus vamaaka rakah en manih pën.” Ivëh, köß teß vaeö rakah e noß pa ö nöß to hikta teß me noß to kikis to kë hah öß, suk a sunë koman peöß. Ivëh, no kikis pe Kristo se teß suk non manih peöß.

10 Ivëh, ka kiu nöß to nonok ke noß na e Kristo, no a ma vu punis se taum suk a neoß, köß taum vëhvaß eoß. O teß se miröß a neoß ko hinën a neoß, ko vakmis ee peöß. Ko poen nöß to haraß vasunë noß, o kokoman peöß to teß vavih e non. Suk a taeah, o poen nöß to hikta teß me noß o kikis, eß o poen ko pamëh nöß to haraß vaeh rakah eoß.

E Pöl To Iu Vaeh Non O Vaman Pa Napan Va Körin

11 Ka soe nöß to sosoe noß, eß a soe pa teß papön. Ivëhkëk, eöm koman to kunkuin o kokoman peöß, köß nok eoß pa soe vaßih. Eöm ivarih, to onöt nem a soe tavus a ma taateß vih peöß. Ivëhkëk eöm to hikta nok va voh nën. Oman, eöß a siß tah akuk, ivëhkëk, eöß to hikta teß voh noß paan o “Aposol apaßpuh” peöm. 12 O poen nöß to teß vaßpeh me voh a noß neöm, paröß nonok noß a ma moeh tah to vataare a non neöm pan, eöß a aposol vamaman. O vu punis to tavus manih peöß, köß sun vakis e noß. Ka manih pa taateß pamëh, no a ma vu tah vatoksean, me a ma vu vëknöm, me a ma meh vu kikis apuh to tavus voh topnineöm. Ka ma tah poë varih to tatanok ne, pare vataare a non neöm pan, eöß to nonok noß a ma kiu pe Sosoenën. 13 Eöß to nok voh a paeh a taateß manih peöm to vatoe me e non pa taateß nöß to nok voh manih pa ma meh kum napan varih to vaman ne e Ieesuß. Eß to teß non a pah tah ro to hikta vatoe non nöß to nok voh manih peöm. Eöß to hikta kon akuk a moniß peöm, marën a nok a kiu pe Sosoenën. Eß a hat pöß peöß ipamëh. Eß se keh teß va non nën, ihan anoe këh a neoß a hat pamëh.

14 Kuru nöß to vamatop e noß, pa nok nös a vakön vavih peöß manem peöm. Ka manih pa vavih pamëh, ne eöß to hikta onöt noß a heß punis a neöm. Eöß to hikta onöt noß a öt këh a neöm a ma tah peöm. Ahik. Eöß to iu varoe noß a öt a neöm. Eöm to nat vavih rakah e nem. O koaß to hikta onöt ne a ununun ta ma tah, ko heß a ma kën tamëëre me ra kën sinëëre. Ahik. A kën taman me ra kën sinan to teß varoe me ne a kiu pa ununun ta ma tah, pare heß a ma pus koaß pee. 15 Ivëh, köß vaeö rakah e noß pa heß a neöm o toßtoß peöß, me a ma tah nöß to teß me noß, marën a vaßaus a neöm. Köm se tavus a napan va po vaman. Eöß to pah iu suntan rakah e noß peöm, eß a tah pöß ko pamëh to nok a neöm, köm hikta iu vi ka no neoß, ha?

16 Oman, o upöm peöm to sosoe va ne sih manih pa taateß peöß pan, eöß to hikta heß punis voh a neöm. Ivëhkëk, o upöm peöm to koman ne pan, “Eöß e Pöl to vakëën voh a neöm, ka manih pa taateß piuk peöß, nöß to vaon a neöm, ko öt akuk këh a neöm a ma tah peöm.” 17 Eöß piuk kës voh a neöm, pa ö nöß to vanö voh nös a ma teß peöß manih peöm, ha? Ahik, eöm koman to nat e nem peöß to hikta nok vavoh nën. 18 Eöß to heß kokoman voh eoß pe Taëtus, keß nö nös peöm. Eöß to vanö vaßpeh me nös eah e meh kea pea. E Taëtus kës to piuk voh ka neöm, pareß kon akuk a ma tah peöm, ha? Ahik, eöm to nat e nem, emöm to vavatet nem o pöh kokoman, me a pah taateß iu.

19 Eöß to koman noß pan, eöm to ëh vahik em pa ma soe kurus varih paröm koman nem pan, emöm to kiun, marën a vatotoopin a soe pemöm manih pa matëëneöm. Ivëhkëk, ahik. Emöm to teß e nem a napan pe Kristo, pamöm nonok nem a ma soe varih pa matan e Sosoenën. Eöm a ma vamomhë rakah peöß, emöm to nonok nem a ma moeh tah kurus poë varih, marën a vakikis o vaman peöm. 20 Eöß to nanaöp e noß pan, eöß tomeß nö nös peöm, paröß taum a neöm to hikta teß va nem manih pa ö nöß to iu va noß. Eöm me tomeß ep ka no neoß to hikta teß va noß manih pa ö nöm to iu ep va ka no neoß. Eöß to nanaöp me e noß pa ep ka neöm to teß nem manih pa taateß vaheheve, me a taateß puhioß, me a taateß heve, me a taateß va okoek a meh teß, me a taateß vasoe vahat, me a taateß vasoe tonun a meh, me a taateß kë koman hah aa, me a taateß miröß a kiu. 21 Eß to hat non peöß se nö nös peöm ke Sosoenën peöß vapoet a neoß manih pa matëëneöm. Eöß se pah tamak eoß pa ö nöß se ep a nap peo varih to nonok voh ne a ma taateß hat poë varih, pare hikta panih a ma taateß pee, ko heß tonun a ma taateß varih, a taateß teßteßvaasiß, me a ma taateß hat vapoet varih nee to nonok voh ne.